2015年12月4日星期五

The Oyster House:蠔不留情

依家食蠔喺好普遍嘅一件事,但要食到高質素,又抵嘅地方就未必多。之前都去過好幾間餐廳,都有生蠔供應,而且款式多,水準高,的確令人回味。今晚嚟到The Oyster House,睇名你就知目的何在,同朋友一於亳不留情盡嚐美味新鮮生蠔。
鋪內地方唔細,並且採用可開放式摺門,可惜,枱與枱之間實在排得太密集。猶幸,環境在燈光及一室木系嘅枱櫈下,仍讓人感到有氣氛,再者,嚟嘅都喺斯文客,懂得放低音量,免騷擾他人。
是晚生蠔就肯定喺其中一位主角,再翻一翻餐牌,生蠔、海鮮以外,仲有好多菜式,以意大利菜式為主,包括:沙律、前菜及小食、自大家製意大利麵、薄餅、廚師精選菜式、多款主菜、甜品……等等,所以,就算唔食蠔都唔使擔心無嘢揀。
此外,喜歡食海鮮,又想多元化,更想優惠抵食,以下依個海鮮拼盤(生蠔、海膽、帶子、鮑魚及熟蝦各兩件,只賣$99)真喺平靚正,抵到暈,「求其」抽其中兩樣都唔止$99啦。點解我無試,只限星期一、二囉!唉!
好在優惠豈止一個,只要每個客人計,惠顧兩杯餐酒,任何生蠔都有六折優惠,計計數,食得生蠔少就唔划算,食得多就有數圍,再者,生蠔款式又多!
bowl意大利香草包
點好餐後,徐徐送上就喺意大利香草包,枱上已有黑醋及橄欖油供客人使用。微暖嘅香草包輕盈清香,讓胃口為餐前作個輕鬆準備。
bowl白酒 $65
紅肉配紅酒,白肉配白酒,小弟嘅飲酒理論就喺咁膚淺,皆因平常都唔多飲,只喺高興場個呷幾啖。嚟自澳洲嘅白餐酒(名字忘記咗),清澈晶瑩,入口帶點果酸香,酒精度唔太高,都頗易入口,啱晒我喎!再者,配合稍後享用嘅海鮮,感覺的確唔錯!
bowl生蠔拼盤
雖然有十多款生蠔,但未必樣樣都有齊,況且,對蠔嘅認識小弟都喺屬於有限公司,所以,對店長講咗唔同地方嘅生蠔想試吓,唔同味道、口感嘅又想試,價錢最好平貴都有啲啦,最後,店長就推介咗以下款式。最欣賞佢哋開蠔俐落,既無碎殼,又細心去埋帶子位方便食用,一撩,一啖,搞掂!
bowlWillapa Bay $38
美國品種,4隻中體積最小巧嘅一款,海水味唔強,口感帶少少綿柔,但蠔味唔失禮,頗適合初食蠔或唔鍾意太重味嘅客人。個人喜好,只唧少少檸汁提鮮,甚至雞尾醬都唔好落。
bowlRollex $42
南非品種,較Willapa大隻少少,海水味突出啲,又唔會太鹹,味道較甜,口感非常綿滑,喺我哋今晚較喜歡嘅品種。
bowlSpanish Rock $49
西班牙品種,舉足輕重嘅份量,喺是晚最有睇頭嘅品種,絕對滿足大大啖嘅慾望。海水味好強勁,證明佢哋唔會搵大量清水去沖洗啲蠔,保持蠔身嘅海水原味,之但喺依一款有點過鹹嘅感覺,所以,多唧啲檸汁喺明智之舉,口感爽脆跟前兩者好唔同。
bowlLa Boite a Bijoux $54
法國品種,幾款中以依款法國蠔嘅蠔味最濃,海水嘅鹹味僅次於隻西班牙蠔,入口同樣爽脆而餘韻長。
幾款蠔的確各有特色,讓人有唔同嘅體驗!既然毫不留情海鮮之夜,就當然要繼續品嚐海鮮菜式,但估唔到之後試嘅廚師特色海鮮菜式都咁有驚喜。

bowl翡翠螺 $108
餐牌寫住用上法國貨色,敢寫得咁明確自然有信心啲,一客有8粒,最鍾意喺佢起晒殼,去埋腸,唔使自己搞,一拮就食得,擺一粒殼做裝飾,朋友話增加佢嘅意識形態喎,哈哈!翡翠螺彈牙有咬口, 伴上自家調製嘅辣醬,沾少少,令鮮味更突出,伴碟嘅青瓜條亦好爽脆。
bowl巴馬火腿生蠔卷 $108  
生蠔新鮮好食,熟蠔做得又如何?珍珠蠔以巴馬火腿卷、青瓜片疊住捲起,內裡更加埋紫洋蔥、甘筍條、九芽菜,口感非常豐富,味道鹹香有層次,蠔味亦相對濃郁,精采嘅前菜。
試過多款海鮮菜式,帶嚟滿腔滋味。跟住想清清哋清新一吓味蕾,所以,揀咗一道沙律作間場,以準備迎接下一道菜。

bowl牛油果煙三文魚沙律 $108
個沙律其實好簡單,就喺牛油果、煙三文魚、紫洋蔥、菠菜嘅組合,淋上自家醋汁,酸香醒胃,唔算有咩驚喜,勝在用料唔錯,夠平穩。
bowl炭燒美國安格斯肉眼扒 $235
主菜我哋只揀一客肉眼扒就夠晒,因為一客有成300g,仲有伴菜份量都唔嘢少,啲薯蓉軟滑又添加咗少少香草香味,烤什菜亦唔錯;件肉眼又如何呢?賣相充滿炭燒坑紋,帶焦香,好吸引,切開睇落好似過咗五成熟,不過,入口又確喺不俗,肉質軟腍富肉香,咬落又夠肉汁。
甜品共有4款選擇,包括招牌嘅香蕉拖肥批、意大利芝士蛋糕、雲呢嗱雪糕及心太軟朱古力蛋糕,原意打算叫頭兩款,可惜大家胃納有限,連一向對甜品有殺錯、無放過嘅小弟,都真喺食得幾飽,所以,只點選招牌一款。
bowl香蕉拖肥批 $55
見好多人都推介依一道甜品,加上香蕉及拖肥兩樣「飛弗」食材,又點會錯過呢!以消化餅底做批底,欣賞佢做得夠薄,鋪上拖肥醬之後,放上香蕉,再填滿焦糖忌廉,垂直軋一小件放入口,濃香滋味。雖然用上拖肥,亦無預期中過甜嘅情況,甜度可以話恰到好處。
早段上菜速度啱啱好,一道菜接一道菜,唔會太急,又唔會等太耐。不過,去到肉眼就等咗好耐,服務上叫做有少少瑕疵,然而整體都好到位,斟水、換碟都勤快做足。喜歡食海鮮菜式,又鍾意唔同食法嚟嘆海鮮,更想有情調環境去享受一下,依度的確喺個上算嘅選擇。

個人評分
味道:9/10
環境:8/10
服務:8/10
抵食:8/10
平均每人消費:HK$400

餐廳資料:
The Oyster House
灣仔謝斐道154號地下C號舖
2511 1212

沒有留言:

發佈留言